約了朋友們8:00機場集合, 我和老公最早到, 比原定集合時間早了45分鐘有多, 我們先去大快活食早餐先, 之後朋友們陸續到達, 於是去航空公司櫃台check in, check in 後去隔離的另一櫃台出示張登機証, 中華航空就會每人送一張沒有面值的台北悠遊咭, 要自己比錢增值 (像香港的八達通), 但今次我們是去高雄和阿里山, 高雄是用一咭通, 所以今次沒有用, 希望下次用得著
今次乘搭中華航空, 由香港飛高雄, 10:10起飛, 飛行時間1小時20分鐘
因為只是一個多小時的航程, 空姐忙碌地派發飛機餐
香港和台灣沒有時差, 11:30 到達高雄小港機場, 過關和攞完行李後大家分頭做嘢, 朋友們係機場唱錢, 而我和老公就去了機場上一層的出境大堂的中華電信增值一張預付卡 (這張預付卡是同事借給我的)
增值了NT300無限上網5日, 仲送NT50電話費, 抵用!
之後大家再係旅遊服務中心申請iTaiwan免費wifi, 有機會在主要旅遊景點、交通樞紐、文化設施以及政府部等地方免費使用wifi, 但事後發覺好多時要企正有iTaiwan標誌附近先用到, 始終用預付卡上網方便得多
一切辦妥就離開機場, 行去搭捷運由R4高雄國際機場站去R11高雄車站, NT35/人, 車程20分鐘
出了捷運站, 行去隔離高雄火車站, 一般台灣火車的種類分為自強(最快)、莒光(次快)、復興(慢)及區間(電聯車,最慢), 我們搭最快的自強號14:00的火車由高雄去嘉義, NT245/人, 車程1小時17分鐘
15:17到達嘉義, 我們先去酒店check in, 由火車站行去酒店好近, 路程大約5分鐘
今晚入住國園商務大飯店, NT1680/間, 包早餐, 只有網線, 沒有wifi
休息一會, 16:00出發, 我們先去食個late lunch, 係酒店附近找到一間麵檔
大部分朋友都一齊叫牛肉麵(大)NT80/碗, 其中一個朋友唔食牛肉, 叫了其他, 可能太肚餓的關係, 覺得這碗牛肉麵非常好味
其實嘉義這個市鎮好細, 景點又少又不太吸引, 因為上阿里山必須要在嘉義出發, 我們又不想太趕今日即上阿里山, 所以今日就悠閒些只在嘉義市走走
大家食飽好滿足, 問了麵檔老闆行去嘉義公園要20-30分鐘, 天氣太熱, 大家都唔想行, 大家行番去嘉義火車站找找公車搭去嘉義公園, 其間有個應該是的士司機作好心問我們去邊, 我們話要去嘉義公園, 的士司機話去嘉義公園的車要19:00才在這裏開出, 叫我們坐他的車, 好似話收NT150一程, 他的車又不能載晒我們8人, 我們當然沒有理會佢, 最後朋友問到火車站對面有幾架公車(7205, 7206, 7209 和 7229) 可以去到嘉義公園
不一會就有公車, 問清楚司機是去嘉義公園, 於是上車, NT18/人, 司機好好人到站就提醒我們落車, 車程大約15分鐘
嘉義公園 (原名中山公園) 建於西元1910年, 公園內有嘉義巿立棒球場、史蹟資料館、射日塔、孔廟、福康安紀念碑、震災紀念碑、國寶級的阿里山森林鐵道老火車頭等, 為嘉義市最大綜合性公園
一入公園就見到iTaiwan標誌, 大家即刻拿手機出來, 嘗試用iTaiwan的wifi上網
之後經過孔廟
穿過牌坊就到達我們的目的地 - 公園內的射日塔 (嘉義巿的地標)
射日塔高62公尺, 為眺望夜景的最佳地點
據說外觀造型設計概念取自於阿里山的神木, 褐色鋁條的紋理如同神木的外皮, 而中間留約高40公尺的「一線天」, 則是取材原住民的射日神話
射日塔平日開放時間至17:00, 我們去到已18:00, 關了門!
除了射日塔, 公園內的景色一般, 所以沒有興趣逗留, 我們之前搭公車經過中央噴水池, 發覺由嘉義公園行去中央噴水池一條直路, 不太遠, 大家決定慢慢行過去
見到中央噴水池附近有條文化路, 就是我們今晚食晚餐的地方 - 文化路夜市掃街
我們先去出名的噴水雞肉飯開餐
我們要留肚食其他, 所以叫了2碗雞肉飯和幾款餸大家一齊食, 雞肉飯一般, 反而其他餸好食
這裏有一樣不太好的是餐牌沒有價錢, 最後佢話收幾多我們就比幾多
之後買了一塊大雞扒一齊食, 食過台北士林夜市的豪大大雞扒, 覺得豪大大雞扒好食好多
跟住行去阿娥豆花, 每人食碗冰凍的豆花, 這裏的豆花同香港不同, 是豆漿加豆花再配其他豆類, 食落去又有口感又香豆味, 好食!
之後見到一檔叫愛玉冰, 老闆解釋比我們知, 愛玉冰裡的愛玉其實是愛玉子, 主要產地以嘉義縣產量最高, 食法是可以放冰塊、蜂蜜, 如喜歡食一點酸味, 可以加入檸檬汁, 大家之前未食過愛玉冰, 於是叫了一碗一齊試試, 感覺似食啫喱, 不過質感是比較結實的
最後我和另外一位朋友每人外賣碗蚵仔麵線返酒店食, 蚵仔麵線係我去台灣最鍾意食的小食
當我們差不多行到酒店, 係附近見到一間麵包店賣雞蛋布丁, 又買了一盒4個的雞蛋布丁食, 賣相吸引, 味道不錯
沒有留言:
發佈留言