復活節貴州黔東南之旅 Day 0 夜宿廣州

今年復活節連清明節的假期非常好, 請一日有六日假, 所以係二月份叫老公睇下可否請到假, 結果可以, 於是開始睇下去邊到旅行好, 目標是中國大陸，因假期其他東南亞地方都會好貴，在討論區見到有人講台江苗族姊妹飯節, 這個節是台江縣老屯、施洞一帶苗族的一個傳統節日,每年農曆三月十五日至十七日舉行,到時苗族青年男女穿上節日的盛裝,歡度這個極富民族特色的傳統佳節, 而剛好這六日假之內正是農曆三月十五日至十七日, 所以二話不說就決定這個貴州黔東南之旅

每次返大陸都係深圳或廣州飛,因為機票平,今次選擇廣州飛,因廣州有早機,而今次台江預先訂不到酒店,打電話去多間酒店都話未知價錢冇得訂,話要等縣政府正式公佈姊妹飯節的各項細節先,所以最後決定廣州早機飛,早些上去找酒店

因早機的關係,要之前一晚在廣州住先

今天帶埋行李返工, 放工後深圳搭火車去廣州東, 但是在過關非常多人, 跟住買火車票一樣多人, 買到22:40的火車票RMB80, 但太夜了, 所以提早求其上一架火車

21:20火車開出, 在火車上企足一個半小時, 晚餐只好在火車上食預先買的三明治, 到站後再轉地鐵去人和站RMB6, 地鐵23:00左右關, 我們坐個班次應該是尾班車, 好險呀!

 23:20到人和站, 出站5分鐘就行到預先叫朋友訂的7天廣州白雲國際機場店RMB138(因朋友做咗會員)